თუ მოზელი ჩურჩულებს, რაინგაუ უფრო სავსე ხმით საუბრობს. აქ რაინი, ჩრდილოეთისკენ მიმავალ ხანგრძლივ გზაზე, დაახლოებით ოცდაათი კილომეტრით დასავლეთისკენ უხვევს და ვენახები ფართო წყლის გაღმა პირდაპირ სამხრეთისკენაა მიმართული, ხოლო ტაუნუსის ტყიანი ბორცვები მათ ზურგს სიცივისგან იცავს. შედეგია სითბო, სხეული და სტრუქტურა — რისლინგი გაშლილი მხრებით.
ეს გერმანიის ისტორიულად ყველაზე დიდებული ღვინის რეგიონია — იმ უდიდესი მემკვიდრეობის აკვანი, რომელიც გერმანიამ მსოფლიო მეღვინეობას შესძინა. სწორედ შლოს იოჰანისბერგში, 1775 წელს, გვიან მოსულმა რთველის დაწყების ბრძანებამ შემთხვევით წარმოშვა “Spätlese” — გვიანი კრეფის ღვინო. ხოლო ებერბახის მონასტრის ცისტერციელმა ბერებმა, რომლებიც 1136 წელს ბურგუნდიიდან ჩამოვიდნენ, პირველებმა შეხედეს ამ ფერდობებს ბურგუნდიული თვალით. გერმანიაში არსად არის რიზლინგი ასე დომინანტური და იშვიათად თუ გვხვდება იგი ასეთივე ავტორიტეტითა და გამორჩეული ხასიათით დაყენებული.
რიუდესჰაიმი — ბერგ შლოსბერგი
რაინგაუს დასავლეთ ნაწილში, მდინარის ზემოთ აღმართულ ციცაბო ფიქალის ტერასებზე, რიზლინგი იძენს მკვეთრ, შებოლილ ინტენსივობას, რომელიც მკაფიოდ განსხვავდება უფრო აღმოსავლეთით, ლიოსის ნიადაგებზე მოყვანილი ღვინოებისგან.
Georg Breuer — Berg Schlossberg Riesling
ძლიერი, მშრალი და ნამდვილად ამბიციური რაინგაუს რიზლინგი: მწიფე ბაღის ხილისა და ციტრუსის არომატები შერწყმულია შებოლილ, ქვიან სიღრმესთან; გამოკვეთილი მჟავიანობა, დაბოლოება კი — ხანგრძლივი. ღვინო, რომელსაც ათი და მეტი წლის დაძველების პოტენციალი აქვს. შეფასება: 9.0 / 10
იოჰანისბერგის სასახლე
Spätlese-ის სამშობლო და, სავარაუდოდ, მსოფლიოში პირველი ვენახი, რომელიც მთლიანად რიზლინგით იყო გაშენებული.
Schloss Johannisberg — Riesling Spätlese
თაფლიანი გარგარისა და თეთრი ატმის არომატები მსუბუქი სიტკბოთი, რომელსაც კლასიკური რაინგაუს ბალანსს გამოკვეთილი მჟავიანობა უნარჩუნებს. ესაა მთელი ისტორია ერთ ჭიქაში, საოცრი და ცოცხალი ღვინო. შეფასება: 8.6 / 10
ასმანსჰაუზენი
რაინგაუს იშვიათი წითელი ღვინის კუთხე, რომელიც დიდი ხანია სახელგანთქმულია ფიქალის ნიადაგებზე მოყვანილი შპეთბურგუნდერით (Spätburgunder – წარმოადგენს ფრანგული ყურძნის ჯიშის, პინო ნუარის (Pinot Noir) გერმანულ სახელწოდებას).
August Kesseler — Assmannshausen Spätburgunder
ღია ფერისა და არომატული, წითელი ალუბლისა და ვარდის ნოტებით, რომელსაც ფონად გასდევს სასიამოვნო ნიადაგის სურნელოვანი ტონები. რაც კიდევ ერთი დასტურია იმისა, რომ შპეთბურგუნდერს აქ სერიოზულად ეკიდებოდნენ ბევრად უფრო ადრე, ვიდრე მას დანარჩენი მსოფლიო ყურადღებას მიაქცევდა. შეფასება: 8.3 / 10